ყველაზე ხშირი კითხვა, რომელსაც გვისვამენ, ასე ჟღერს: „რა ღირს საიტი?" ისეთივე პასუხი აქვს, როგორიც კითხვას „რა ღირს სახლი?" - დამოკიდებულია იმაზე, რამდენ ოთახიანია, სად დგას და ვინ აშენებს.
მაინც შევეცადოთ კონკრეტიკას. ქვემოთ ქართული ბაზრის რეალური დიაპაზონებია.
ფასების რეალური დიაპაზონი
სავიზიტო საიტი - 800-2500 ₾
ერთიდან ხუთ გვერდამდე: მთავარი, ჩვენ შესახებ, სერვისები, კონტაქტი. საკონტაქტო ფორმა, მობილურზე მორგება, ძირითადი SEO. ეს საკმარისია იურისტისთვის, კლინიკისთვის, მცირე სამშენებლო კომპანიისთვის - ყველასთვის, ვისაც სჭირდება, რომ Google-ში მოძებნისას სოლიდურად გამოჩნდეს.
კორპორატიული საიტი - 2500-6000 ₾
მრავალგვერდიანი სტრუქტურა, ადმინ პანელი, სადაც თავად ამატებთ სიახლეებს და პროდუქტებს, ორი ან სამი ენა, ბლოგი, გუნდის გვერდი. აქ უკვე იზრდება როგორც დიზაინის, ისე დეველოპმენტის მოცულობა.
ონლაინ მაღაზია - 4000-15 000 ₾
კალათა, გადახდის სისტემა, საწყობის აღრიცხვა, ფილტრები, მიწოდების ლოგიკა. ფასი მკვეთრად იზრდება, როცა საჭიროა ინტეგრაცია არსებულ სააღრიცხვო პროგრამასთან ან განვადებასთან.
ვებ-პლატფორმა ან აპლიკაცია - 8000 ₾-დან
ჯავშნის სისტემა, CRM, საგანმანათლებლო პლატფორმა. აქ ფასი ფუნქციონალით იზომება, არა გვერდებით.
რა ცვლის ფასს ყველაზე მეტად
დიზაინის წარმომავლობა. მზა შაბლონი 300-500 ლარით ამცირებს ბიუჯეტს, მაგრამ თქვენი საიტი დაემსგავსება კიდევ ათას სხვას. უნიკალური დიზაინი ჯდება, სამაგიეროდ ბრენდი თქვენია.
ენების რაოდენობა. მეორე ენა არ ნიშნავს ფასის გაორმაგებას, მაგრამ ამატებს 20-30%-ს - თარგმანის სტრუქტურა, ცალკე SEO, ადმინში ორმაგი ველები.
ინტეგრაციები. გადახდა, SMS, 1C, განვადება, CRM - თითოეული ცალკე სამუშაოა. ეს ის ადგილია, სადაც ბიუჯეტი ყველაზე ხშირად იზრდება უკვე დაწყების შემდეგ.
კონტენტი. თუ ტექსტები და ფოტოები თქვენ გაქვთ, დაზოგავთ. თუ არა - კოპირაითინგი და ფოტოგადაღება ცალკე მუხლია.
ხარჯები, რომლებზეც ხშირად არ საუბრობენ
- დომენი - 50-120 ₾ წელიწადში (.ge ჩვეულებრივ უფრო ძვირია, ვიდრე .com)
- ჰოსტინგი - WordPress-ისთვის 50-300 ₾ წელიწადში; ინდივიდუალურ კოდზე აწყობილი პროექტისთვის 100-900 ₾
- SSL სერტიფიკატი - უფასოა. თუ ამაში ფულს გთხოვენ, იკითხეთ, რატომ
- ტექნიკური მხარდაჭერა - 400-1200 ₾ წელიწადში, თუ განახლებებს თავად არ აპირებთ
რატომ განსხვავდება შეთავაზებები ორჯერ
თუ ერთი და იმავე დავალებაზე მიიღეთ 1500-ლარიანი და 4000-ლარიანი შეთავაზება, სავარაუდოდ ორი სხვადასხვა რამეს გთავაზობენ. სთხოვეთ ორივეს დაწერონ: რამდენი გვერდი, უნიკალური დიზაინია თუ შაბლონი, ვინ წერს ტექსტებს, შედის თუ არა SEO, რამდენი ხნის მხარდაჭერაა ფასში და ვის რჩება საიტის კოდი.
ხშირად აღმოჩნდება, რომ იაფი შეთავაზება არ მოიცავს კონტენტს, SEO-ს და მხარდაჭერას - ანუ იმას, რაც საიტს მუშა საიტად აქცევს.
როგორ დაზოგოთ სწორად
დაზოგვა შეიძლება ეტაპებად გაშვებით. პირველ ეტაპზე გაუშვით ის, რაც ბიზნესს ახლა სჭირდება - ხუთი გვერდი და საკონტაქტო ფორმა. როცა ნახავთ, საიდან მოდის მომხმარებელი, მეორე ეტაპზე დაამატეთ ბლოგი, მეორე ენა ან მაღაზია. ეს უკეთესია, ვიდრე თავიდანვე გადაიხადოთ ფუნქციონალში, რომელიც შეიძლება არასდროს გამოგადგეთ.
ჩვენს კალკულატორში შეგიძლიათ საკუთარი პარამეტრებით გამოთვალოთ სავარაუდო ბიუჯეტი - როგორც WordPress-ისთვის, ისე ინდივიდუალური კოდისთვის.